| बिहिबार, कार्तिक ४, २०७८

कतारी राजकुमारी मनास्लु हिमाल आरोहण गर्दै

कतारी राजकुमारी शेखा आस्मा अल थानीले गोरखाको मनास्लु हिमाल आरोहण गर्ने भएकी छिन् । उनी मनास्लु आरोहणका लागि अहिले मनास्लु बेसक्याम्प पुगिसकेकी छिन् ।

सेप्टेम्बरको २७ तारिखमा थानीले मनास्लु हिमाल आरोहण गर्ने सेभेन सम्मिट ट्रेकिङ प्रालिले जनाएको छ ।
‘आस्मा अल थानी अहिले बेसक्याम्पमा हुनुहुन्छ । उहाँले यही सेप्टेम्बरको २७ तारिखमा मनास्लु आरोहण गर्दै हुनुहुन्छ’, कीर्तिमानी आरोही मिङ्मा डेविड शेर्पाले भने, ‘मौसममा खराबी नरहे निर्धारित मितिमै आरोहण गर्नुहुनेछ ।’


अल थानी विश्वका सात महाद्वीपका सात सर्वोच्च शिखर आरोहण गर्ने र दुई ध्रुवमा पाइला राख्ने लक्ष्य सहित अहिले मनास्लु आरोहणको क्रममा नेपालमा आएकै हुन् । यसअघि उनले दक्षिण अमेरिकाको ६,९६९ मिटरको माउन्ट एकोनकागुआ, अफ्रिकाको ५,८९५ मिटर अग्लो माउन्ट किलिमन्जारो र यूरोपको ५,६४२ मिटर अग्लो माउन्ट एल्ब्रस आरोहण गरिसकेकी छिन् ।


गत २०२१ को वसन्तमा सगरमाथा आरोहणमा आएकी उनी बेस क्याम्पसम्म पुगेकी थिइन् तर मौसममा खराबीका कारण आरोहण जोखिमपूर्ण र असुरक्षित भएकोले अभियान रद्द गरिएको थियो ।


‘यो वर्ष मेरो लागि चुनौतीपूर्ण रह्यो । मैले विगत कैयौं वर्षदेखिको सपना विश्वको सर्वोच्च शिखर ‘सगरमाथा’ चढ्ने योजना बनाएकी थिएँ तर यस वर्ष हुन सकेन’, उनले भनेकी थिइन्, ‘यो कुरा स्वीकार्न मलाई केही समय लाग्यो । जित्नुहोस् वा हार्नुहोस्, कहिल्यै असफल हुनुहुन्न । त्यसैले लड्नुहोस् जबसम्म तपाइँले अब म लड्न सक्दिन भन्ने अवस्था आउँदैन ।’


आस्माले कतारमा महिला सशक्तिकरणलाई अगाडि ल्याउन र यस क्षेत्रका महिलाहरूले नयाँ पुस्तालाई ठूलो सपना बोक्ने प्रेरणा दिउन् भन्ने चाहन्छिन् ।