| मङ्लबार, बैशाख ४, २०८१

एसईईको सम्पूर्ण तयारी पूरा, आठवटा विद्यालयबाट १० भन्दा कम परिक्षार्थी सहभागी हुदैँ

बिहिबारबाट सुरु हुने माध्यमिक शिक्षा परीक्षा (एसईई)को सम्पूर्ण तयारी पूरा भएको शिक्षा विकास तथा समन्वय इकाइ गोरखाले जनाएको छ ।

परीक्षा केन्द्र तथा केन्द्राध्यक्ष निर्धारण, प्रश्नपत्र तथा उत्तर पुस्तिका सबै केन्द्रमा पठाउने काम भइसकेको इकाइ प्रमुख सुवासचन्द्र आचार्यले जानकारी दिए ।

यसबर्षको एसईईमा गोरखाबाट ३६ सय ६२ जना परीक्षार्थी सहभागी हुँदैछन् । कार्यालयका अनुसार एसईईमा १९ सय १३ जना छात्रा र १७ सय ४९ जना छात्रले परीक्षा दिँदै छन् । यस वर्षको एसईईमा साधारणतर्फ ३५ सय २७ जना, प्राविधिक तर्फ १ सय १ र गे्रडवृद्धितर्फ ३४ जना परीक्षार्थी सहभागी हुने भएका छन् । जिल्लाका तीन विद्यालयहरु भवानी मावि मान्वु, त्रिवेणी मावि सेरा र ज्ञानमार्ग मावि घ्याल्चोकबाट एकसय एकजना विद्यार्थीहरुले प्राविधिक तर्फको एसईई परीक्षा दिने कार्यालयले जनाएको छ ।

यसबर्षको एसईईमा आठवटा विद्यालयबाट १० भन्दा कम परीक्षार्थीहरुले एसईई दिने कार्यालय प्रमुख आचार्यले जानकारी दिए । चार वटा बोर्डिङ र चार वटा सामुदायिक विद्यालयहरुले १० भन्दा कम विद्यार्थी एसईईमा सहभागी गराउने कार्यालयले जनाएको छ ।

कार्यालयका अनुसार बोर्डिङतर्फ गोरखा नगरपालिकाको मनकामना बोर्डिङ स्कुलबाट छ जना, सूर्यमुखी बोर्डिङ स्कुलबाट आठजना, जेनियस बोर्डिङ स्कुलबाट आठजना र पालुङटार नगरपालिका ठाटीपोखरीको बालज्योती इङ्लिस बोर्डिङ स्कुलबाट नौजना विद्यार्थीहरु एसईईमा सहभागी हुँदै छन् ।

त्यस्तै सामुदायिक विद्यालयहरुतर्फ सिरानचोक गाउँपालिका ५ को चित्रेपोखरी माविबाट सबैभन्दा कम चारजना विद्यार्थीहरु एसईईमा सहभागी हुँदै छन् । सहिद लखन गाउँपालिका ६ बतासेको भगवती हिमालय मावि घैरुङबाट छ जना, गोरखा नगरपालिकाको रत्नलक्ष्मी मावि डुम्रीडाँडाबाट सातजना र राष्ट्रिय मावि घलाङबाट छजना विद्यार्थीहरु एसईईमा सहभागी हुने कार्यालयले जनाएको छ ।

सबैभन्दा धेरै परीक्षा सहभागी गराउनेमध्य सामुदायिक विद्यालय रहेको छ । गोरखा नगरपालिका ८ आहालेस्थित सरस्वती माविले सबैभन्दा धेरै एकसय २७ जना परीक्षार्थीहरु एसईईमा सहभागी गराउने भएको छ । बोर्डिङतर्फ गोनपा ८ रानीवनको दि ओल्ड क्यापिटल मावि रानीवनले ९४ जना विद्यार्थीहरु सहभागी गराउँदै छ ।

एसईईको लागि कार्यालयले आवश्यकता अनुसार सुरक्षाकर्मी सहित तीनसय ९३ जना कर्मचारी परिचालन गरेको छ । यो वर्षको आरुघाट गाउँपालिका ३ स्थित देवी जलकुमारीबाट ४ र गोनपा ८ स्थित सरस्वती मावि आहालेबाट १ गरी जम्मा ५ जना दृष्टिविहिन र गोनपा १० टक्सार स्थित मनकामना बहिरा माविबाट १६ जना बहिरा विद्यार्थीहरु पनि एसईईमामा सहभागी हुदैँ छन् । एसईई परीक्षाको सम्पुर्ण पूर्व तयारीहरु सम्पन्न भइसकेको शिक्षा विकास तथा समन्वय इकाइ कार्यलय गोरखाका प्रमुख सुवास आचार्यले बताए ।

‘प्रश्नपत्रहरु केन्द्र नजिकको प्रहरी चौकीमा पुगिसक्यो’, उनले भने, ‘केन्द्राध्यक्ष तोकेर उत्तर पुस्तिकाहरु पनि सबै केन्द्रमा पु¥याईसक्यौँ ।’ कार्यालय जिल्लाभर २३ वटा परिक्षा केन्द्र तोकेको छ ।

सबैभन्दा धेरै गोरखा नगरपालिकामा ६ वटा परीक्षा केन्द्रहरु तोकिएको छ भने चुमनुब्री गाउँपालिकामा एउटा पनि परिक्षा केन्द्र नराखिएको कार्यालयको भनाई छ । परीक्षार्थी सङ्ख्या कम रहेका कारण चुमनुब्रीमा परीक्षा केन्द्र नराखिएको कार्यालयले जनाएको छ । कार्यालय गत चैत ९ गते २३ वटै केन्द्रका केन्द्राध्यक्षहरुलाई अभिमुखीकरण समेत गराइ सकेको छ ।

प्रतिक्रिया दिनुहोस्