प्रजिअ दाहालको मुक्तक संग्रह सार्वजनिक
खानेहरुका लागि भोज नहोस् लोकतन्त्र
लुट्नेहरुका लागि मोज नहोस् लोकतन्त्र
खान र लुट्न पनि नसक्ने जनताका लागि
निर्विवाद बोझ नहोस् लोकतन्त्र …
यी मुक्तक हुन् मुक्तककार भोला धरातलका । भोला धरातल अर्थात भोला दाहाल गोरखाका प्रमुख जिल्ला अधिकारी हुन् । साहित्यमा अपार मोह भएका भोला धरातलका यी र यस्तै दुईसयभन्दा धेरै मार्मिक मुक्तकहरुले भरिएको मुक्तक संग्रह ‘आँखाहरु पोखिएका बेला’ नयाँ शैलीमा भर्खरै सार्वजनिक भएको छ ।
मुक्तककार धरातलले आफ्नो मुक्तक संग्रह आँखाहरु पोखिएको बेला ऐतिहासिक गोरखा दरबार आसपासका अनुपम प्राकृतिक श्रृङ्खलामा भिडियोग्राफीमार्फत सार्वजनिक गरेका छन् । दरबारका क्षेत्रका विभिन्न दृश्यहरुलाई पृष्ठभूमि बनाएर भिडियो छायांकन गरी मुक्तककार स्वयंले कृति सार्वजनिक गरेका हुन् ।
घामपानीले बनाएको इन्द्रेणी हौ तिमी,
मनमोहक हिमश्रृङ्खलाकी श्रेणी हौ तिमी,
कहिल्यै कसैसंग तुलना नहुने अलग्गै मेरी,
विश्वास, प्रेम र समर्पणकी त्रिवेणी हौ तिमी ।
मुक्तक संग्रह सार्वजनिक गर्दै उनले भनेका छन्, ‘गोरखा नेपाल एकीकरणको आरम्भ विन्दू, ऐतिहासिक भूमि, वीरताको परिचय, गौरवको अनुभूति । यस्तो ऐतिहासिक भूमिमा आफ्नो मुक्तकसंग्रह सार्वजनिक गर्न पाउँदा म अत्यन्त गौरवान्वित भएको छु । कृति प्रकाशन गरिदिने आवरण प्रकाशन र आदरणीय रमेश पौडेल सर धन्यवादका पात्र हुनुहुन्छ ।
मनले तस्वीर कोर्दै थियो आँखाहरु पोखिएका बेला
सम्बन्ध यो जोड्दै थियो आँखाहरु पोखिएका बेला
अनगिन्ती मान्छेहरुको भीडमा भएर पनि
उसैलाई खोज्दै थियो आँखाहरु पोखिएका बेला ।
उनको मुक्तक संग्रहमा यस्तै यस्तै २२४ मुक्तकहरु समेटिएका छन् । समसामयिक सामाजिक, आर्थिक, साजनीतिक विषयबस्तु, प्रेम प्रणयका भावना र मुलुकको यथार्थ अबस्थाको चित्रण गरिएका मुक्तक यस संग्रहमा समेटिएका छन् ।
सम्बन्धहरुको सुनौलो आयाम गज्जव छ,
यस्तो लाग्छ हरेक दिन उत्सव छ,
जहाँजहाँ घाम, त्यहाँत्यहाँ छायाँ भएजस्तै
यसरी बस्यौ कि हृदयमा छुट्टिन असम्भव छ ।
यस्ता मुक्तक रच्ने प्रमुख जिल्ला अधिकारी दाहालको सिर्जनशिलता देखेर द्रवित हुँदै प्रकाशक रमेश पौडेलले भनेका छन्, ‘देशका सबै सिडिओसाबहरु यस्तै भैदिए … ?
