गोरखामा क्रेन दुर्घटनामा एकको मृत्यु
गोरखामा क्रेन दुर्घटनामा परी एक युवाको मृत्यु भएको छ । आईतबार गोरखा नगरपालिका–१० हुल्चे फाँटमा क्रेन दुर्घटना हुँदा बारा, जितपुरका १९ वर्षीय प्रिन्स अन्सारीको मृत्यु भएको हो ।
काम गर्ने क्रममा क्रेनको ब्रेक फेल भई करिब २० मिटर तल खोल्सामा खस्दा घटना स्थलमै अन्सारीको मृत्यु भएको जिल्ला प्रहरी कार्यालय गोरखाले जनाएको छ । निर्माणधिन अविनाश अर्वाएकर प्रालि (ह्यचरी) मा काम गर्ने क्रममा उनको मृत्यु भएको प्रहरी निरीक्षक ध्रुब प्रसाद शर्माले जानकारी दिए ।
प्रहरीका अनुसार उनको शव पोष्टमार्टमका लागि गोरखा अस्पताल ल्याइएको छ । क्रेन चालक पर्सा, वीरगंजका २४ वर्षीय अजहर अन्सारीलाई नियन्त्रणमा लिई उक्त घटनाबारे थप अनुसन्धान भईरहेको प्रहरीको भनाई छ ।
