जन्मभूमि गोरखा (कबिता)
जन्मभू महिमा भुल्नै सकिँदैन कसै गरी
प्रथम स्पर्श माटो त्यो मान्छु म जननीसरि ।।
१
जन्मभूमि तिमी मेरी साईनो मातृपुत्रको
छातीमा सजिँदै बस्ने चम्किने कण्ठहार हो ।।
२
शिक्षा सम्मान सम्पत् श्री जति आय गरे पनि
चिनारी भन्नु नै मेरो एक मात्र त हौ तिमी।।
३
तिम्रो उन्नतिमा मेरो हृदय हाँस्न पुग्दछ
तिम्रै बिगतमा हाम्रो नेपाल गर्व गर्दछ ।।
४
जहाँ रहूँ म पृथ्वीमा हुने छौ साथमा तिमी
सहचर्य कहाँ टुट्ला पुनर्जन्म हुँदा पनि ।।
५
नकुँदेको हिरा हो यो म जन्म्या गोरखा घर
उजिल्याउन खाँचो छ शिल्पीका जोश जाँगर ।।
६
दिए आहुति प्राणैका राष्ट्र निर्माण युध्दमा
प्रणाम गर्छु श्रध्दाले पितापुर्खा समग्रमा ।।
७
इतिहास लुकेका छन् ढुङ्गा माटोतिरै पनि
उपेक्षा तिनको जस्तै भिल्लका देशमा मणि ।।
८
लक्ष्य महान बोकेर लड्यो गोरखा निरन्तर
विन्दु जो सिन्धु भै छायो मेची काली सवैतिर ।।
९
सक्दिन हेर गाएर तिम्रो गाथा सुकिर्तिको
म त भ्याउन्न लेखेरै महिमा इतिहासको ।।
१०
गोर्खा हो राष्ट्र निर्माता इतिहास महान छ
जन्मभूमि सदा मेरो देवतासरि पूज्य छ ।।
(अनुष्टुप् छन्द)
२३ जुलाई २०१९
गोरखा बजार
हालः म्याडिसन अमेरिका ।