ओसन क्लवको आर्टिफिसियल टर्फ निर्माणमा ३५ लाख खर्च, अझै २० लाख अपुग, आठलाख ऋणमा,
गोरखा नगरपालिका ९ दलभञ्ज्याङस्थित द ओसन क्लवले आर्टिफिसियल टर्फ निर्माण गर्दा ३५ लाख १९ हजार रुपैयाँ खर्च भएको छ । शनिबार पत्रकार सम्मेलन गरी क्लवका अध्यक्ष अमित खत्रीले टर्फ निर्माण गर्नका लागि अझै २० लाख रुपैयाँ अपुग रहेको जानकारी गराए ।
‘३५ लाख मध्ये करिब २६ लाख मात्रै जुटेको छ’ अध्यक्ष खत्रीले भने, ‘आठलाख रुपैयाँ ऋणमा जुटाइएको थियो । अझै २० लाख रुपैयाँ बराबरको संरचना निर्माण गर्न बाँकी नै छ ।’
गोरखा नगरपालिकाबाट ११ लाख ४६ हजार, गण्डकी प्रदेश संसद कोषबाट सात लाख ८ हजार र बिभिन्न ब्यक्ति र संघ संस्थाबाट ८ लाख १२ हजार रुपैयाँ सहयोग जुटेको उनले बताए । ‘अहिले सम्म भएको कामको करिब ८ लाख ऋण तिर्न बाँकी छ’ अध्यक्ष खत्रीले भने । टर्फको बाहिरी संरचना शौचालय, चेन्जिङ रुम निर्माण गर्न अझै २० लाख लाग्ने अनुमान गरिएको उनले बताए ।
टर्फको मैदानका लागि २३ लाख, संरचना तयार गर्न, ढुवानी, निर्माण ज्याला र खरिदमा अन्य रकम खर्च भएको क्लवले शनिवार सार्वजनिक गरेको हो । अखिल नेपाल फुटबल संघबाट एक लाख ५० हजार, पालुङटार नगरपालिकाबाट एक लाख ५० हजार र गोरखा समाजबाट २५ हजार आउने आश्वासन पाएको तर आउन बाँकी रहेको क्लवले जनाएको छ । ‘यो रकम जुट्यो भने करिब पाँच लाख अहिले सम्म भएको कामको खर्च तिर्न बाँकी देखिन्छ’ अध्यक्ष खत्रीले भने ‘यस बाहेकका अन्य सबै कामका लागि थप खर्च लाग्नेछ ।
अहिले क्लवले निर्माण गरेको आर्टिफिसियल मैदानमा बिभिन्न समयमा प्रतियोगिता, प्रशिक्षण हुँदै आएको छ । ‘जिल्लाभरका खेलाडीलाई प्रशिक्षण दिएर ब्यवशायीक खेलाडी तयार गर्ने लक्ष्य लिएका छौँ’ अध्यक्ष खत्रीले भने ‘निर्माण पुरा गर्न सबै स्थानीय तह सँग सहयोगको अपेक्षा गरेका थियौँ, तर जुटेको छैन ।’